Таних шинж тэмдэг 
Тэхийн шээгний хөгшин мөчир нь хүрэн ягаан юмуу хүрэн туяатай сааралдуу, залуу мөчир нь хүрэн юмуу цайвар шаргал нимгэн холтостой, бөмбөлөг хэлбэрийн өтгөн мөчиртэй, 1.5 м өндөр ургадаг. Навчис нь тонгоруу өндгөрхүү хэлбэртэй, шаантган суурьтай, оройдоо ялимгүй гурван салбанта, 1.5-3.0 см урт, 1-2 см өргөн, дээд тал нь гялгар ногоон, доод тал нь цайвар тод боловч төвийж гараагүй судалтай, нүцгэн. Цэцгүүд нь жижигхэн, цайвар шаргал өнгөтэй. Жимсгэнэ улаан, жижигхэн 5-7 мм урт, 4-5 мм өргөн, бөмбөлөг хэлбэртэй. Нэг жимс дотроо 6 ширхэг үртэй. Тэхийн шээг 6-р сард цэцэглэж, 8-р сард үр нь боловсорч гүйцдэг. Тэхийн шээг ган хүйтэнд тэсвэртэй хөнгөн сийрэг элсэнцэр хөрсөнд сайн ургадаг. Байгаль дээрх нөхөн сэргэлт сайн. Үрээр үржүүлдэг байна.